„S‘ Ressort Onterhaltig stellt sech vor“

  • Ressort Unterhaltung

Es bitzeli ongwohnt, aber wenn s Ressort Onterhaltig als einzigs Ressort de ganzi Frogeboge uf Mundart usföllt, döff de Ileitigstext ned us de Reihe tanze!
Momentan esch s 5-köpfige Team fliiessig dra am Idee sammle und verschedeni Könschtler azfroge. Verrote werd natürli no nüt, es döffed also alli gspannt sii, was Ressort Onterhaltig för Ass im Ärmel hed!  


D Ressortmetgleder

Ofem beld vo lengs noch rächts: Jannik Rey, Angi Erni, Karin Fischer, Roger Fischer und Angi Losenegger.

Als Ressortchef bhaltet de Roger i osiem mängisch chaotische Gröppli stets de Dorchbleck.

De Jannik, weiss wases bruucht, damet en Party di ganzi Nacht duuret ond nie langwilig werd. Drom
onterstötzt er de Roger als Stellverträter i oisem Ressort.

D‘Angi Erni hed schnelli ond langi Fenger ond esch ganz fliissig bim schribe vo oisne Protokoll. Osserdem onterstötzt sie de Jannik bim Onterstötze vom Roger.

Karin teilt gern uus, steckt schlächt ii – trotzdem debii. 😉 Sie kömmeret sech om die räschtlechi Schriib-Arbet.

Oises Küken d‘Angi Losenegger esch voller guete Idee, wie mer d‘ Chend am KTF chönd onterhalte.


Was esh d Hauptufgab vom Ressort Onterhaltig?

S’KTF17 meteme geniale Rahmeprogramm, vom Freiziitprogramm bis zur Obigunterhaltig, onvergässlech z’mache.


Was gsähnd ehr als gröschti Herusforderig, woner bewältige müend?

Die velle kreative Idee i realestischi Möglechkeite omzwandle und debii de Öberbleck zbhalte.


Uf was freued ehr euch am Meischte?

Das mehr es Onterhaltigsprogramm uf d Bei stelled, wo vo de Chliinschte bis zu de Gröschte für alli öbis debi esh und natürli uf die grossartigi Geborstagsparty förd Angela, löhnd euch loh öberrasche! 😉


Welli Schlagziile möcht euches Ressort während de Wettkampftäg im Bleck läse?

Rekordtemperature im Aargau

S‘ Tornfäscht im Freiamt sorgt för chochend heissi Stemmig. S’abwächsligsriiche Onterhaltigsprogramm lockt tuusigi Torner ond Zueschauer aa und heizt mächtig ii.


Ressortchef Onterhaltig

Roger Fischer

Roger Fischer, TV Merenschwand

Was send dini wechtigschte Ufgabe als Ressortchef?

Deför sorge, dass alli vom Ressort guet onterhalte send, Loftgitarre spele ond auno es bizli de Öberbleck bhalte.

Was esh dini gröschti Motivation, de beachtlechi Isatz z leiste?

D’Froid dra e sones grosses Tornfäscht aktiv metzgstalte ond d’Vorfroid uf zwöi unvergässlechi Wochenend.

Erzähl eus über dis beschte Tornfäschterläbnis:

Im 2006 am Chreistornfäscht in Merischwand nochere dorchzächte Partynacht en suuberi Üebig bim Show-Uftret anegleid.
Was mer debii au super gfalle hed esch, wie mer im Verein de grossi Organisations-Uufwand meteme glonige Fäscht gmeischtert händ.


Wiiter säge
Share on Facebook0Tweet about this on TwitterShare on Google+0Email this to someonePrint this page

Keine Kommentare zu ""S' Ressort Onterhaltig stellt sech vor""


    Möchtest du etwas sagen?

    HTML Text erlaubt